ເປີດສູນບໍລິຈາກເຄື່ອງ ລະດົມໄປຊ່ວຍເຫຼືອຜູ້ປະສົບໄພນໍ້າຖ້ວມ ໃນທົ່ວປະເທດ

ເປີດສູນບໍລິຈາກເຄື່ອງ ລະດົມໄປຊ່ວຍເຫຼືອຜູ້ປະສົບໄພນໍ້າຖ້ວມ ໃນທົ່ວປະເທດ

ສະຫະພັນກິລາແລ່ນ-ລານຄົນພິການແຫ່ງຊາດລາວ ຮ່ວມກັບ ຈິດອາສາ ມັງກອນທອງ ແລະ ກະຊວງສຶກສາທິການ ແລະ ກິລາ ເປີດສູນຮັບເຄື່ອງຂອງບໍລິຈາກເພື່ອກຽມນຳໄປຊ່ວຍເຫຼືອຜູ້ປະສົບໄພນໍ້າຖ້ວມໃນທົ່ວປະເທດ ຊຶ່ງຈຸດຮັບບໍລິຈາກຈະເລີ່ມ ລະຫວ່າງວັນທີ 15-17 ກັນຍາ 2024 ເລີ່ມເວລາ 15:00 ໂມງ ຫາ 20:00 ໂມງເປັນຕົ້ນໄປ, ໃນໂອກາດດັ່ງກ່າວ ທາງໂຮງງານຜະລິດນໍ້າກ້ອນ ແລະ ນໍ້າດື່ມ ໂລມາຄຳ ກໍໄດ້ມອບນໍ້າດື່ມຈໍານວນ 5.000 ແພັກ ມູນຄ່າ 100 ລ້ານກີບ ແລະ ສວນອາຫານມັງກອນທອງ ກໍຍັງໄດ້ມອບເຂົ້າກ່ອງ ມູນຄ່າ 25 ລ້ານກີບ ໄປຊ່ວຍເຫຼືອພີ່ນ້ອງຊາວລາວ ທີ່ໄດ້ຮັບຜົນກະທົບຈາກໄພນໍ້າຖ້ວມ ໂດຍສະເພາະແມ່ນເຂດເມືອງປາກງື່ມ, ເມືອງຫາດຊາຍຟອງ ແລະ ເມືອງສີໂຄດຕະບອງ.

ພິທີເປີດສູນຮັບບໍລິຈາກເຄື່ອງເພື່ອຊ່ວຍເຫຼືອຜູ້ປະສົບໄພນໍ້າຖ້ວມ ຈັດຂຶ້ນທີ່ ໃນວັນທີ 14 ກັນຍາ ຜ່ານມາ ທີ່ໜ້າຮ້ານອາຫານ ຟີນິກ ເມືອງສີສັດຕະນາກ ນະຄອນຫລວງວຽງຈັນ ໃຫ້ກຽດເຂົ້າຮ່ວມໂດຍ ທ່ານ ວັດທະນາໄຊ ລາດສະວົງສິງ ປະທານ ສະຫະພັນກິລາແລ່ນ-ລານຄົນພິການແຫ່ງຊາດລາວ ທັງເປັນປະທານຈິດອາສາ ມັງກອນທອງ ແລະ ທ່ານ ບຸນມີ ຫຼ່ຽມໄຊຍະຈັກ ປະທານສະຫະພັນບານເຕະຄົນພິການຕາແຫ່ງຊາດລາວ ພ້ອມດ້ວຍຄະນະ ແລະ ສະມາຊິກ ຕະຫລອດຮອດສື່ມວນຊົນລາວ ເຂົ້າຮ່ວມຢ່າງພ້ອມພຽງ.

ໂອກາດດັ່ງກ່າວ ທ່ານ ວັດທະນາໄຊ ລາດສະວົງສິງ ໃຫ້ສຳພາດວ່າ: ໃນສະພາບປັດຈຸບັນຄືຮູ້ກັນແລ້ວວ່າ ພີ່ນ້ອງຊາວລາວ ພວມປະເຊີງບັນຫາກັບໄພທຳມະຊາດນໍ້າຖ້ວມ ສະນັ້ນ ຂ້າພະເຈົ້າໃນນາມປະທານສະຫະພັນກິລາແລ່ນ-ລານຄົນພິການແຫ່ງຊາດລາວ ທັງເປັນປະທານຈິດອາສາ ມັງກອນທອງ ມີຄວາມເປັນຫວງເປັນໃຍຕໍ່ເຫດການດັ່ງກ່າວ ຈຶ່ງໄດ້ປຸກລະດົມເອົາວັດຖຸປັດໄຈຈາກບັນດາພາກສ່ວນເພື່ອນຳໄປມອບໃຫ້ພໍ່ແມ່ປະຊາຊົນຊາວລາວໄດ້ຢ່າງທົ່ວເຖີງ ຂໍໃຫ້ທຸກຄົນຈົ່ງມີສະຕິເຝົ້າລະວັງ ແລະ ລະມັດລະວັງຕົວ ຕະຫຼອດເວລາ ໂດຍທາງພວກເຮົາຂໍເປັນກຳລັງໃຈ ແລະ ອວຍພອນໃຫ້ທຸກຄົນຈົ່ງມີຄວາມປອດໄພ ສ່ວນເຄື່ອງຈາກການລະດົມໄດ້ມາຄັ້ງນີ້ ຈະນຳໄປມອບໃຫ້ທຸກຄົນຢ່າງທົ່ວເຖິງ.

ທ່ານ ວັດທະນາໄຊ ລາດຊະວົງສິງ ກໍຍັງໄດ້ຮຽກຮ້ອງເຖີງບັນດາພາກສ່ວນຫາກມີຄວາມຢາກຊ່ວຍເຫຼືອພີ່ນ້ອງຊາວລາວຜູ້ປະສົບໄພນໍ້າຖ້ວມໃນຂອບເຂດທົ່ວປະເທດ ກໍສາມາດນຳມາມອບການສົົມທົບບໍລິຈາກສິ່ງຂອງນຳກັນໄດ້ ຊຶ່ງທາງພວກເຮົາໄດ້ຕັ້ງຈຸດລະດັມທຶນຮັບຂອງບໍລິຈາກທີ່ຮ້ານບັນເທີງ ພີນິກ ເຂດຫຼັກ3 ເມືອງສີສັດຕະນາກ ນະຄອນຫຼວງວຽງຈັນ ເລີ່ມລະຫວ່າງວັນທີ 15-18 ກັນຍາ 2024 ເພື່ອນໍາເອົາຂອງບໍລິຈາກໄປມອບໃຫ້ຜູ້ປະພົບໄພຄັ້ງນີ້ຕາມຈຸດປະສົງທີ່ວາງໄວ້ໃຫ້ສຳເລັດ.

ໃນໂອກາດເປີດສູນບໍລິຈາກຮັບສິ່ງຂອງຕ່າງໆ ທາງໂຮງງານຜະລິດນໍ້າກ້ອນ ແລະ ນໍ້າດື່ມ ໂລມາຄຳ ກໍໄດ້ມອບນໍ້າດື່ມຈໍານວນ 5.000 ແພັກ ລວມມູນຄ່າ 100 ລ້ານກີບ ແລະ ສວນອາຫານມັງກອນທອງ ກໍຍັງໄດ້ມອບອາຫານ ເປັນເຂົ້າກ່ອງ 500 ກ່ອງ ລວມມູນຄ່າ 25 ລ້ານກີບ ໄປຊ່ວຍເຫຼືອພີ່ນ້ອງຊາວລາວ ແລະ ໂອກາດດັ່ງກ່າວ ທາງຈິດອາສາ ມັງກອນທອງ ກໍໄດ້ບິແບ່ງນໍ້າດັ່ງກ່າວ ຈຳນວນ 2,000 ກວ່າແພັກ ໄປຊ່ວຍພີ່ນ້ອງຊາວເມືອງປາກງື່ມ ແລະ ຊາວເມືອງຫາດຊາຍຟອງ ໂດຍສະເພາະແມ່ນທີ່ເຂດບ້ານໝາກຮຽວ, ບ້ານສິມມະໂນຄວາຍແດງ, ບ້ານທ່າພະ, ບ້ານບໍ່ໂອ ແລະ ບ້ານຕ່າງໆ ລວມທັງຫ້ອງວ່າປົກຄອງເມືອງຫາດຊາຍຟອງ ເພື່ອນຳເອົານໍ້າດື່ມ ໂລມາຄຳ ທີ່ບໍ່ສາມາດນຳໄປມອບໃຫ້ທົ່ວເຖິງສືບຕໍ່ໄປມອບໃຫ້ທຸກໆຄົນທີ່ປະສົບໄພນໍ້າຖ້ວມເຂດເມືອງດັ່ງກ່າວ. ຫຼັງຈາກນັ້ນ, ກໍຍັງຈະສືບຕໍ່ໄປມອບໃຫ້ ເມືອງສີໂຄດຕະບອງຕື່ມອີກ

ພາບ-ຂ່າວໂດຍ ສົງການພັນແພງດີ